تغريدات تنفع كل عربي غضب الله عليه ففكر بالانتقال والاستثمار في تركية
••••••
ملخص تجربتنا العائليه للسفر والاقامة بتركيا
====
سمعنا كثيرا عن المعيشة بتركيا، وخاصة بعدما صرنا نسمع عن سهولة الحياة والطبيعة الجميلة وشفنا صور تركيا، وأن الشغل متوفر والحياة رخيصه وافتح لك مشروع أو محل ووو، فصار عنا رغبة بتجربة حياة جديدة وخصوصا بعدما صارت الحياة بالأردن صعبة كثيرا وغلاء معيشة وضرائب، فقررنا نطلع احنا وإخوان زوجي وعائلاتهم لخوض المغامرة، وكمقدمة بعثنا سلفي لتركيا للاستطلاع وكأنه كتيبة جيش فايتة بحرب، وحتى يشوف لنا كيف الحياة والشغل وفرص المعيشة فيها، والاستثمار.
مكث اسبوعين وأرسل لنا تقريره بكلمتين ما رح ننساهم.. تعالوا بسرعة!.. تعالوا الوضع نار!.
صفينا أمورنا بعمان، (والحمدلله أننا لم نبع بيتنا) لكن صفينا مصالحنا واشغالنا، وتعلم زوجي واخوانه لغه بحد أدنى يا دوب يفكوا الخط، وجمعنا مبلغا محترما، وتوجهنا إلى تركيا.. بلاد الأحلام، واشترينا شقتين باسنيورت وفتحنا مصل خاصه بنفس مجال عمل زوجي بعمان.
وأول ما وصلنا انبسطنا كثير وكنا طايرين من الفرح ثقافة جديدة وحياة حلوة ومطاعم وطبيعة جميلة وكل يوم زيارة لمعلم شكل.. شيء خرافي!.
بعدين زي ما بيحكوا لما عشنا على الواقع وبمرور الوقت راحت السكرة واجت الفكرة، لما تكون جاي زياره كم أسبوع غير لما تقيم فيها.. بشكل دائم وهذا اللي صار معنا بعد أقامة ٨ سنوات:
1- تأقلمنا بسهولة مع المحيط لأنه في عرب كثير وما شعرنا بالغربة، طلع في زيارات جارات ونميمة ستات الصباحية زي عمان تماما!..
2- الحياة مش رخيصه زي ما حكولنا وخاصة آخر سنتين كل شي زاد، فرق تكلفه المعيشه عن عمان لا يزيد عن ٢٠ أو ٢٥ بالمية وأضف لها تكلفة الاقامة والسفر وتأسيس بيت وفتح عدادات وتتريك خطوط ومش عارفة ايش بتطلع نفس الشي تقريبا ويمكن اكثر.. واللي بيحكيلك سعر العقارات رخيصة بتكون يا اما بعيدة كثير أو قديمة جدا أو بمنطقة شعبية كثير، أو بعيدة عن خطوط المواصلات، أنت بعمان ما ترضى تسكن فيها، في سقق بتركيا ١+٢ قد الكبريته ٨٠ متر سعرها ٢٥٠ الف دولار!.
3- حطينا أولادنا بالمدارس الحكومية وكان التعليم شبه مجاني والمدارس مرتبة صراحة بس مشكلتنا كانت في تنمر الأولاد الأتراك على أولادنا، خلوهم يكرهوا الدراسة والمدارس وكان ممكن تضيع عليهم سنه دراسية مشان مواعيد التسجيل والانتقال والتصديقات بس الله ستر.
4- مشكلة اللغة مش صعبة مقدور عليها وخاصة الأطفال بيتعلموا بسرعه بس أنا لهللا ما بعرف أحكي تركي عكس ولادنا وزوجي وإخوانه.
5- النصب كثير وزي مرحبا هون، بيتدرس صراحة، و كلله يسمسر وبنصب على كله وخاصة إذا كنت ما تعرف تحكي تركي تصير زي أعمى في حارة مفتحين الكل بده يلطوش وينصب ويسمسر علينا وقد ما تحكي عن حالك مفتح لازم يقرصوك.. النصب عندهم فن واخلاق…يبلشوا يبيعوا ويشتروا فيك قبل ما تطلع من مطار صبيحة!.. الكل بتركيا بيعرض علينا المساعدة وخدماتهم، شو هل اخلاق والتقوى، وحرصهم على مصلحتنا!؟.. تفكر أنهم أحد الصحابة لتكتشف لاحقا انهم من كفار قريش.. وناصبين لك كمين لينصبوا عليك!.
6- بللشت المشاكل بشغل زوجي وإخوانه، كانوا مفكرين زي الأردن استأجر محل ورخصة من الأمانة وفكت خلصت.. هنا الوضع مختلف وأكثر تعقيدا، رسوم وضرايب، أصغر محل أو مشروع أو كشك بده ٢٠ إلى ٢٥ الف ليرة سنويا باقور و أجرة محاسب قانوني وغيره، طبعا غير أذون العمل وأجار المحل وضريبة إيجار شهر عن كل ٣ شهور وضريبة المبيعات والدخل والبلدية ويافطة اعلانية.. وبالنهاية الأتراك عندهم عنصرية ما يدخلون عندك المحل مع أنه شغل موظف تركي في الواجهة.. والعرب أغلبهم يادوب مطلعين أكلهم وسكنهم.. ضرايب عاليه وكل يوم لغم جديد بالشغل مشاكل أقامة وإذن العمل ورسوم باقور وضمان اجتماعي وsgk وسيكورتا، بس كلهم بيخبوا عنك المعلومة لانهم متنفعين.
زوجي شاف كيف أغلب المحلات والمشاريع العربيه عم بتسكر الواحد تلو الآخر.. خاف وبلش يتذمر وعلى رأيه مهما ضخيت أموال في تركية فإنها تتبخر.
7- أن تلاقي عملا في تركية فهذا صعب كثير وشبه مستحيل وإذا لقيت يادوب ٢٠٠٠ ليرة فلازم يكون عندك دخل من برة تركيا بس سلكنا حالنا بتحويلات خارجية على أمل تتحسن الحياة.. صراحه أمورنا بللشت تتكركب.
8- في نقطة مهمة.. طلع معظم العرب الموجودين سوريين وعراقيين وليبيين ونتيجة مشاكل أمنية وحروب ببلدانهم الله يفرجها عليهم، أو متعثرين هربانين من مشاكل مالية وقضايا ببلدانهم الله يسدد عنهم.. يعني وجودهم بتركيا مش اختياري.. وجودهم اضطراري لعدم وجدو بديل ومافي بلد ثانية تعطيهم أقامة يروحوا عليها، أو نقطه عبور للهجرة غير الشرعية لأوروبا، و احنا اللي كنا مفكرينهم جايين ترف وطمع بحياه افضل زي ما كنا نسمع قبل ما نيجي (منك لله يا خالد)!.
9- هنا قرر زوجي وإخوانه إيقاف النزيف، للامور مش واضحة وقوانين الاقامة متغيرة وصرنا عايشين بقلق وترقب.. قرروا يرجعوا يصفوا أمورهم بتركيا ونرجع عمان.
كنا خايفين من شماتة الناس بس القرار صعب و صار.
10- بعنا محلنا بأقل من نصف تكلفته وكمان بعنا شقه واحدة وكمان خسارتنا فبها كانت كبيرة، اشتريناها ٨٠ الف دولار وبعناها اقل من ٣٠ الف دولار نتيجة انخفاض سعر صرف الليرة.. لما جينا كان سعر صرف الليرة ٢.٧ ولما بعناها كانت ٥ ليرات لكل دولار.. والآن وصلت إلى ٧.٥ ليرة لكل دولار.. خساره راسمالية فادحة، زينا زي كل اللي اشتروا عقارات، والي مش مصدق واشتري عقار يجرب يعرضه للبيع فقط لتعرف قيمته السوقية الحقيقية الحال، بس خذ حبة ضغط لأنك رح تنصدم من حجم خسارتك.. منك لله يا خالد!..
قررنا نخلي الش الثانية رجل النا بتركيا علشان ننزل فبها كل ما نزور تركيا.. تركيا بتجنن وحلو كثير وطبي وتنظيم بس ممتازة للسياحه فقط، تيجي كم مشوار بالسنة تنبسط وتغير جو، بدون وجعه راس بإقامة وضرايب وكومسيونات وفتح عدادات، أما كإقامة دائمه وعمل واستثمار فصعبة كثير.
11- نصيحتنا والنصيحة بجمل.. انتقو مصادر معلوماتكم لأن أغلب اللي عم تسمعوه عن تركيا مش دقيق ومضلل من متنفعين وتجار وسماسرة عقارات وإقامات بهدف استدراجكم.. كل هدفهم تيجوا ليسمسرو عليكم كم دولار.
=====
ملاحظة:
هذي تجربة شخصية لنبين بعض الأمور للناس ولست بوارد الدخول بنقاشات أو جدال مع أحد، ويجوز غيرنا اجوا ونجحوا بتركيا لكن حسب ما شفنا ومن تجربة معارفنا ٩٠ بالمية من اللي اجوا سواء اشتروا عقارات أو فتحوا مصالح خسروا ثرواتهم وادخاراتهم وخسارتهم كانت فادحة.. ويجوز غيرنا فضلو الاستمرار وخسروا كل شي وهم ينامون الآن تحت الجسور وبالحدائق، احنا اجتهدنا وقراراتنا تحتمل الصواب والخطأ بالأخر هذا رأينا وتجربتنا، ولست بوارد الدخول بجدالات مع أحد لإثبات الصواب أو الخطأ.
لكن أهم درس تعلمناه هو لا تصدق كل ما تسمع ونصف ما تراه، تركيا مش زي أميركا والخليج وأوروبا.. طلعت فلم كبير.. لا تطلع من تحت الدلف لتحت المزراب.. وأكيد كلامي ما رح يعجب ورح يستفز المتنفعين والنصابين وبعض تجار الإقامات والعقارات لأنه يؤثر على أعمالهم ليستمروا بنشر معلومات مغلوطة وغير دقيقة ويتصيدون الناس بوسائل التواصل الاجتماعي.. لكنه واقع للاسف، وإلا فما سبب استماته البعض وتشجيعهم الناس تيجي تركيا تقول وزير السياحة التركي.. شو غايتهم؟.
وأنا أقول منك لله يا خالد لأني متأكدة من أن كل واحد جاء إلى تركيا وراه واحد زي خالد بطريقة أو بأخرى.
انتهى
يعجب ورح يستفز المتنفعين والنصابين وبعض تجار الإقامات والعقارات لانه يؤثر على أعمالهم ليستمروا بنشر معلومات مغلوطة وغير دقيقة ويتصيدوا الناس بوسائل التواصل الاجتماعي.. لكنه واقع للأسف.. وإلا فما سبب استماته البعض وتشجيعهم الناس لتذهب إلى تركيا!؟.. تقول وزير السياحه التركي!.. ما غايتهم!؟.
ولذلك أنا أقول منك لله يا خالد لأني متأكدة أن كل واحد جاء إلى تركيا وراءه واحد زي خالد بطريقه أو بأخرى.
وشكرا
